【峰旅】的部落格

難得去馬爾代夫渡假，當然想盡情去玩，唔洗成日計住D錢，今次我馬爾大夫介紹間物超所值嘅酒店俾大家，等你哋可以嘆住世界玩得暢快

於2016年中才開幕嘅Ozen By Atmosphere提供all-inclusive全包式package"The Atmosphere INDULGENCE"，吸引唔少從世界各地遠道而來嘅旅客！呢個package除咗包含早午晚三餐同餐廳飲料單中嘅酒水之外，亦包含一次excursion導賞遊（如出海觀賞海豚丶日落巡航或參觀居民島etc)丶一次黃昏海釣、一次60分鐘spa或出海深潛，以及一頓喺海底餐廳嘅高級晚餐！係咪極之吸引？而家等我慢慢逐一介紹一下

Ozen 位於Maadhoo Island，喺馬累機場坐40分鐘豪華快艇就到，今次因為只得我哋同行三位，所以有機會自己試吓揸遊艇，超級開心！

好快就入到島，遠遠就見到Ozen嘅職員一字排開喺碼頭旁迎接我哋，傳說中嘅海島渡假開始啦！接待人員帶我哋去等check in嘅休息區辦理入住手續，在旁嘅服務人員已經立即遞上迎賓香檳同冰凍毛巾俾我哋歇歇，無幾耐小黑管家就話房間已經準備好，並提醒我哋記得傍晚返去front desk預訂餐廳同喜歡嘅活動，然後就帶我哋先到房間休息一下。

今次我哋入住Wind Villa水上屋，係位於島嘅另一邊，由主島行到Wind Villa最尾嘅房間需要大概7-10分鐘，唔想行都無問題，因為酒店提供單車，咁出出入入就唔會怕遠喇！

Villa依著一長排嘅木棧道而建，木棧道嘅盡頭就係海底餐廳"M6m"。

從餐廳走出來靠左邊嘅係附泳池觀日落景嘅Wind Villa with Pool，而右邊就係我哋入住嘅不附泳池Wind Villa啦～

一推開房門就見到房間落地大玻璃窗後嘅那片蔚藍海洋，不禁＂嘩＂咗一聲，見到呢個大海畫面成個人都精神曬！舒適嘅雙人大床面向落地玻璃窗，讓住客可以攤喺床上睇海。梳化前面仲有一塊大大嘅透明玻璃地板，唔洗濕身就已經觀賞到珊瑚魚

推開主臥室側面嘅木門係獨立超大浴室，裡面配置超大蛋型浴缸，對住無敵大海景，旁邊仲有超貼心嘅小木桌，可以放酒杯放點心！

Ozen提供嘅梳洗用品係英國精品品牌Asprey，我幾鍾意嗰股淡淡嘅清香。除咗基本嘅洗髮水丶護髮素丶淋浴露丶潤膚露以及牙膏牙刷外，仲有一小樽SPF30防曬液(最後被我哋用清)丶一樽蚊蟲叮咬修護乳液（呢個我哋反而無用過)，同有一小盒潤唇膏。

跟住我哋就推開落地玻璃門出去戶外露台，住水上屋最主要原因當然就係享受呢個面對無敵大海嘅完美露台！露台唔算好大，我哋住嘅係不附私人泳池觀日出景嘅房間，同附私人泳池嘅房間Wind Villa with Pool基本上面積一樣，不過Wind Villa with Pool欣賞到嘅係日落景。

露台設施一應俱全，躺椅、小梳化同受歡迎嘅懸空吊床都有，原本自認不怕高嘅我見到吊床超開心，迫不及待爬上去攤吓，結果一上去向下一望⋯⋯腳下空空真係有D得人驚，瞓咗一陣就覺得有D腳軟，都係上返嚟先

室外露台必備嘅直達海面小樓梯，住水上屋嘅呢兩日我哋都係由呢度落去浮潛。